Reykjalundur lungnateymi

Fyrir hverja?

Lungnateymi sinnir eftirfarandi sjúklingahópum:

• Langvinn lungnateppa og aðrir teppusjúkdómar
• Trefjalungnabólga og aðrir herpusjúkdómar í lungum
• Þjálfun fyrir og eða eftir lungnaskurðaðgerð s.s. vegna krabbameins í lunga
• Aðrir lungnasjúkdómar, þjálfun fyrir og eftir lungnaígræðslu
• Sjúkdómsástand þar sem einkenni frá lungum s.s. mæði eru ríkjandi

Hvert er markmiðið?

Markmiðin eru að:

• auka þol og vöðvastyrk
• rjúfa vítahring mæði og hreyfingarleysis
• auka skilning á áhrifum lifnaðarhátta
• breyta lífsstíl varanlega
• stuðla að aðlögun að sjúkdómnum og einkennum hans
• bæta líkamlega getu, andlega líðan og félagslega færni

Nánari upplýsingar

Hjá lungnateymi fer fram endurhæfing fólks með sjúkdóma í öndunarfærum. Um er að ræða fullorðið fólk á öllum aldri með langvinna lungnasjúkdóma, skerta getu og minnkuð lífsgæði vegna mæði og þrekleysis.

Sumir þurfa endurhæfingu eftir bráð veikindi eða skurðaðgerðir til dæmis fyrir og eftir lungnaígræðslu. Skilyrði er að fólk sé hætt tóbaksnotkun áður en endurhæfing hefst. Veittur er reykleysisstuðningur við komu á göngudeild eða með símaviðtölum.

Lungnaendurhæfing byggist á samvinnu margra fagstétta og er sniðin að þörfum hvers og eins.