Markhópur
Bergið er stuðnings- og ráðgjafasetur fyrir ungt fólk upp að 25 ára aldri og er þjónustan óháð greiningum og öðrum skilyrðum.
Markmið
Markmið Bergsins er að bjóða upp á lágþröskuldaþjónustu með áherslu á stuðning, fræðslu og ráðgjöf. Í Berginu er lagt upp með að skapa notalegt og öruggt umhverfi fyrir ungt fólk sem vill fá aðstoð fagfólks og notenda með fjölbreytta reynslu.
Þjónusta
Félagsráðgjöf • Náms- og starfsráðgjöf • SálfræðiþjónustaNánari upplýsingar
Þjónusta Bergsins er þannig uppbyggð að ungmenni, upp að 25 ára, geta óskað eftir þjónustu og fengið viðtal við ráðgjafa tíma sem allra fyrst, á staðnum eða í gegnum fjarþjónustu. Öll þjónusta Bergsins er ókeypis fyrir ungmenni á öllu landinu.
Ráðgjafar eru með breiða fagþekkingu og reynslu í störfum með ungu fólki. Markmiðið er að bjóða andlegan stuðning og ráðgjöf sérhönnuð fyrir ungmenni með hlýtt, heimilislegt og opið viðmót. Rannsóknir sýna að þessi aldurshópur sækir sér ekki hjálp fyrr en vandinn er orðinn mikill. Kerfin geta líka verið flókin og afmörkuð við tilteknar greiningar eða vanda sem gerir það að verkum að erfitt er að fá heildstæða þjónustu.
Bergið vill ná til ungmenna fljótt og vel, helst áður en vandinn er orðinn mikill eða flókinn. Með fræðslu og stuðningi finnum við leiðir í samvinnu að bættri líðan og eflum virkni ungmenna í samfélaginu. Mikilvægt er að tryggja aðgengi að geðheilbrigðisþjónustu fyrir þennan hóp en þar hefur Bergið Headspace skapað sér stöðu sem eina lágþröskuldaúrræðið sem í boði er fyrir þennan hóp. Um 300 ungmenni sækja þjónustu Bergsins á hverjum tíma.
