Þjónustan er fyrir fólk 18 ára og eldri.
Markhópur teymisins er fólk með þroskahamlanir og/eða hamlandi einhverfu sem þarfnast sértækrar geðheilbrigðisþjónustu vegna geðræns vanda.
Geðheilsuteymið er fyrir þá sem þurfa meiri og sérhæfðari þjónustu en veitt er á vegum heilsugæslunnar.
Þjónustan er þverfagleg og er veitt með heimavitjunum og viðtölum í húsnæði teymisins. Í teyminu starfa atferlisfræðingur, geðlæknir, heimilislæknir, hjúkrunarfræðingar, iðjuþjálfi, sálfræðingur, skrifstofustjóri og þroskaþjálfar.
Teymið sinnir ekki frumgreiningu s.s. vegna gruns um einhverfu eða skyldar raskanir.
Hlutverk og markmið þjónustu geðheilsuteymisins:
- Að stuðla að og viðhalda bata og færni.
- Að tryggja einstaklingsmiðaða þjónustu.
- Að tryggja samfellu og samþættingu í meðferð.
- Að efla sálrænt og félagslegt heilbrigði einstaklingsins.
- Að hvetja til sjálfshjálpar og sjálfsvirðingar.
- Að styðja einstaklinginn í að lifa innihaldsríku lífi.
- Að veita stuðning og ráðgjöf til aðstandenda og starfsfólks stoðþjónustu sveitarfélaga.
Áhersla er á samskipti við hinar ýmsu stofnanir, þjónustu- og stuðningsaðila og félagasamtök. Unnið er á jafnræðisgrunni með áherslur á einstaklinginn í fyrirrúmi.
Stuðst er við hugmyndafræði sjálfstæðs lífs, valdeflingar, Bjargráðakerfisins Bjargar (byggt á díalektískri atferlismeðferð) og rannsóknir í taugavísindum.
Þjónusta
- Efla styrkleika til að ná tökum á bata og líðan.
- Auka þekkingu á leiðum til að ná jafnvægi í daglegu lífi.
- Auka skilning, styrk og getu til að takast á við geðrænan vanda.
- Mat á andlegri líðan og líkamlegu ástandi.
- Mat á lyfjameðferð.
- Meðferð, fræðsla og stuðningur til einstaklingsins, fjölskyldu hans og/eða stuðningsaðila
- Stuðningur til að auka félagslega virkni og gildi í daglegu lífi.
- Ráðleggingar um hvar hægt sé að fá frekari stuðning eða fræðslu.
Einstaklingurinn í fyrirrúmi
- Þjónusta teymisins er heildræn og notendamiðuð með áherslu á samþætta nálgun. Teymið hefur að leiðarljósi að skoða alla þætti sem hafa áhrif á andlega heilsu.
- Einstaklingurinn er í fyrirrúmi, hans óskir, gildi og þarfir.
- Áhersla er lögð á þá meðferð sem einstaklingurinn þarfnast hverju sinni út frá klínísku mati.
- Stuðst er við gagnreyndar aðferðir og árangur metinn reglulega.
Mikilvægt er að önnur þjónusta, svo sem þjónusta frá heilsugæslu og/eða almenn geðheilsuþjónusta hafi verið fullreynd áður en sótt er um til geðheilsuteymis taugaþroskaraskana.
